unknown - Communauté de communes - Centre Corse - RQO2024 O2 055

Documents similaires

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2

unknown - Communauté de communes - Centre Corse - RQO2024 O2 055 Document publié le Lundi 1 janvier 2024 Lien du pdf (unknown - Communauté de communes - Centre Corse - RQO2024 O2 055)Thèmes du document : Pêche et métiers de la mer, Associations, ONG et mouvements politiques, Travail et emploi, REPONSE DU PRESIDENT DU CONSEIL EXECUTIF

OBJET : Pulitica linguistica / chì seguita pà i cartulari in corsu ?

Aghju da cumincià pè a fine. M’ete postu una quistione, v’aghju da risponde in modu generale : traminduie, cù a vostra sensibilità, à un mumentu ete ramintatu chì a terra, a lingua, sò dui puntelli maiò, di e nostre rivendicazione cumune. L’aghju detta, à a fine di l’estate, aghju cumnciatu à cuntattà i rispunsevuli eletti di i vostri gruppi (ùn aghju ancu vistu à Josepha pè u mumentu è mi ne scusu), a ridicu oghje è a ripiteraghju di modu più cuncretu, in accordu cù u Cunsigliu esecutivu è a magiurità territuriale :

Facciu una pruposta, femu una pruposta, di un travagliu cumunu, micca solu cù i naziunalisti, ma prima i naziunalisti, è diceraghju ch’e no circhemu à teneci in u filu di a deliberazione di u 5 di lugliu. Dunque mi girgu più particularmente ver di Pierre Ghionga ma dinù ver di una naziunalista indipendentista chì ùn hà micca vutatu a deliberazione, pè dì chì pensemu chì a situazione attuale, ma ne riparlaremu, è quandu dicu a situazione attuale, include l’affare di i prigiuneri pulitichi è di e seguite di u so imprigiunamentu.

Ci dumanda di riflette à modu nostru, secondu u passu ch’è no circaremu di piglià, ci cumanda di riflette à un’andatura cumuna nant’à u fondu è nant’à u prugettu. Dunque per esempiu, inde u duminiu di a lingua è in u duminiu di a lotta contr’à a speculazione è di l’accessu à a prupietà, pensu ch’è no pudemu fà un travagliu cumunu. À u livellu di l’Assemblea è fora di l’Assemblea, allargatu, per circà à sbuccà inseme nant’à raporti, ch’ùn saranu micca solu quelli di l’Esecutivu puliticamente, ma saranu quelli di una pruposta è di pruposte ch’è no averemu custruitu inseme è tandu ùn saranu più in una logica magiurità/opposizione. Quessa a pruposta pulitica a ripetu oghje perchè l’aghju fatta digià, averaghju l’occasione di sviluppalla, for di a presenza mediatica, ascultendu dinù ciò ch’è v’averete da dì o da dumandà o da risponde, ma a facciu perchè mi si pare chì cunvene tutt’à fattu è à u sensu di e vostre quistione è à l’andatura generale chì mi pare critica ma rispunsevule è, a diceraghju senza altru, sò sicuru chì parechje di e vostre critiche è di e vostre rimarche e facciu meie.

Dunque què hè pè a risposta generale.

Pè ripiglià l’affare di i pannelli è pè vene dopu nant’à u fondu, aghju nutatu chì ùn ete micca fattu un « piattu », diceraghju, è ch’ùn été micca circatu à stumentalizà st’affare. Hè un peccatu, m’hà cuntrariatu assai, quant’ellu hà pussutu cuntrarià à tutti quelli chì tenenu caru a so lingua. È sò sicuru chì ancu quelli chì forse senza falla apposta, anu fattu un sbagliu inde i nostri servizii, ùn sò micca cuntenti di ‘ssa situazione, ùn sò micca suddisfatti. Vi vulia ramintà dinù, cù un surrisu, ch’e facia parte di e militante è i militanti di u 91 chì avianu cacciatu i pannelli. Aghju da circà oghje à esse in u filu di ‘ssu sensu quì.Pè rispondevi è custì ne chjamu à a nostra memoria cumuna, sapete quant’ella hè difficiule di fà passà ancu l’istruzzione in un’amministrazione chì forse sin’à u 2025 ommancu, qualsiasi e qualità di i funziunarii, ùn avia micca integratu a lingua corsa cum’è qualcosa d’essenziale, malgradu i sforzi fatti da Pierre Ghionga. Pigliu l’esempiu semplice di i nomi di i paesi, micca nant’à i pannelli, nant’à l’indiririzzi di e nostre lettare, malgradu u fattu chì ci sia una cunsigna ripetuta à tutti i servizii, una banca integrata nant’à tutti l’urdinatori cù i nomi in corsu, 3 volte nant’à 5 ricollanu i prugetti di lettare incù i nomi tuscanizati, malgradu tuttu ciò ch’e possu dì, malgradu tuttu ciò ch’ella pò dì a DGS, e cunsigne è tuttu, ùn passa micca ! È dunque chì si passa ? Rinviu, una volta, duie volte, trè volte, e lettare. À un mumentu datu pò ancu fà nasce una tensione trà l’elettu è l’amministrazione è a sapete.

Nant’à st’affare custì, un affare più chè disgrazievule, l’aghju custattatu, aghju dumandatu e spiegazione. Nurmalamente, ùn avveria micca da accade, perchè ci hè un prucessu : u serviziu di e Strade deve dumandà à u nostru serviziu linguisticu chì hè a manera curretta di scrive. S’ellu ci hè u minimu dubbitu, devenu dumandà à e ghjente di u lucale, puru à l’Università. Ci deve esse una cumanda trasmessa à l’impresa. S’ella rivene cù un sbagliu, ci vole à ricusà è à fà riparte. Ùn hè micca stata cusì… Aghju dumandatu subbitu e spiegazione, l’aghju avute, forse mi cunvenenu, forse ùn mi cunvenenu micca, sò sicuru in tutti i casi chì ùn ci hè micca un’intenzione gattiva da a parte di quelli chì sò à l’origine di u sbagliu. Dunque, emu da fà tuttu per currege. Què hè u primu affare, i pannellli.

Di modu più generale nant’à a pulitica linguistica, m’ete postu unepoche di quistione. Simu avà, l’aghju detta, puru sta mane inde a stampa, ma l’avia detta prima, ci restanu nurmalamente trè anni di mandatu.

Ci hè una situazione ch’ùn si pò micca staccà l’affari bugettarii, l’affari di e Risorse Umane, è l’affari di a pulitica.

M’avete dumandatu : ch’è diventatu u Cunsigliu di a lingua ? Ci hè a risposta amministrativa è ci hè a risposta pulitica.

À livellu amministrativu aghju da rivene nant’à a strutturazione oghje di u Serviziu lingua corsa. Ci n’hè di più dipoi chì simu ghjunti, a sapete. Eramu à 19 posti. Oghje ci hè 4 funziunarii, è di prima trinca, di categuria A, ch’ùn sò micca à u so postu per cagiò di salute è ch’ùn pudemu micca rimpiazzà : u Direttore, u capu di a missione amministrativa è finanziaria, l’Assistente di u Direttore, è u Capiserviziu di u cunsigliu linguisticu. Tutti i 4 ùn ci sò più dipoi parechji mesi è ùn li pudemu micca rimpiazzà (li mandu un salutu fraternu è i ringraziu per tuttu ciò ch’elli facenu è li pregu una salute bona è migliurata).

Ci hè dui posti aperti dipoi mesi è mesi è ch’ùn emu micca trovu e risorse : quellu di u cuurdinatore pedagogicu, à a furmazione è l’insignamentu, è quellu di Capiserviziu di a difusione sucetale . Dunque averete capitu chì quandu ci hè 19 posti, 4 ch’ùn ci sò micca, 2 ch’ùn si trovanu micca a risorsa, ùn fermanu più chè tredeci è chì nant’à i 13 a maiò parte sò di categuria C o B. Ci manca un puntellu maiò in l’amministrazione, qualsiasi a vulintà (è tengu à ringrazialli!) di quelli chì ci sò.

Quelli chì ci sò si sforcanu ma ùn ponu fà di più chè ciò ch’elli facenu oghje.

Dunque ci vole à truvà e risorse è ci vole à fà e scelte bone è ne rivengu à e nostre decisione amministrative. Hà da ghjunghje (ringrazieghju à a DGS per interim è tutti i servizii) u novuDGS. Stu novu DGS hà da avè, in accordu cun mè, di prupone, dopu à discussione cun l’eletti di l’urganizazione sindicale, una nova urganizazione. Sò favurevule, a sapete, è ghjè precisata in u nostru raportu d’urientazione, à rifurmà l’urganizazione amministrativa ancu à livellu di a lingua. Pensu chì a lingua ùn pò micca esse un serviziu frà tutti l’altri inde una direzzione glubale. Pensu chi s’è no vulemu avè una pulitica attempu sucetale, una vera pulitica linguistica, à l’infora è à l’internu, ci vole à ripinsà a nostra urganizazione. Ci vole à fà e scelte bone. È ne vengu à a prisentazione di u RAO, u raportu nantu à i posti ch’à da esse fattu da quì à ottobre. Vidite ch’è no ci avvicinemu di una risposta, è una risposta di fondu.

Finiscu cù u fondu di u nostru raportu d’orientazione.

Digià a scelta di u Raportu d’Orientazione era una manera di dì chì u CE è a magiurità ùn vulianu micca decide soli nantu à l’affare di a lingua, l’aviamu detta, di a lingua è nant’à l’astri sugetti cuncernati da u raportu d’orientazione.

Emu dettu digià un annu è mezu fà chì nant’à e tematiche di primura maiò pè a Corsica è pè u populu corsu, ci vulia à travaglià d’un’antra manera, dà à l’Assemblea di Corsica è à quelli chì sò l’attori di u settore cuncernatu a pussibilità di riflette in cumunu. L’emu fatta incù a lingua, l’ete detta, è emu pigliatu un ritardu ch’ùn hè micca suddisfacente, hè vera.

Avà sò ch’e vi prupongu : emu idintificatu a quistione di a lingua cum’è una priurità. Rivinimu, travagliemu inseme, avanzemu nantu à u raportu nant’à a pulitica linguistica, u stacchemu o micca da a discussione nant’à l’autunumia . Eiu pensu ch’ùn ci vole à staccalla, perchè a sapete bè è l’emu detta dipoi tant’anni, chì senza un statutu ufficiale pè a lingua corsa tutti i sforzi ch’è no faremu ùn ci permittaranu micca di sbuccà nant’à u nostru scopu.

Dunque vi prupongu ch’è no travaglimu cusì nant’à stu tema è nant’à d’astri, è vi dicu dinù chì sò favurevule, pè finisce induve emu cuminicatu, nant’à i pannelli, sò favurevule à ciò ch’elli ci sianu i nomi di i lochi solu in corsu è chì quessa pò fà l’ugettu di una pruposta in u nostru raportu nant’à a pulitica linguistica.